Carolina Fernández (4º ESO) entrevista a SéS, o “fenómeno” musical galego
Orfa
de pai, foi o seu avó mugardés quen a coidou desde pequena e lle
inculcou a paixón pola música.
Nunca
pensou que triunfaría, porén, acaba de publicar o seu cuarto disco,
Opoñerse
á extinción, enche
auditorios enteiros, séguena milleiros de persoas e está a ser a
cantante galega máis coñecida do momento, non só en Galicia, senón
noutras cidades fóra do país como París ou Lisboa.
A
letra das súas cancións ten carácter reivindicativo, fala da
defensa da identidade galega e da igualdade de xénero, das vivenzas
da súa vida e do amor pola súa lingua; e todo isto fai que conecte
moi ben co seu público.
O
que máis ilusión lle fai, comenta, é que a xente queira ir a vela.
-
Como te definirías como persoa?
Son
unha persoa moi normal, moi vitalista e moi enérxica, pero tamén
moi reflexiva e crítica, por iso ás veces podo resultar
“desagradábel” en escena, porque falo de inxustizas que me fan
sufrir, pero creo que non o son, considérome unha tía simpática e
moi do chan, moi normal.
-
Cales son os teus ideais?
Eu
creo na igualdade por riba de todo, na igualdade de todos os seres
que habitamos o planeta, na igualdade de dereitos e
responsabilidades. Creo que todas e todos temos a obriga de ser boas
persoas e honestos, e ninguén pode fuxir desta responsabilidade.
-
E os temas principais das túas cancións?
Son
o meu día a día, as miñas experiencias e as miñas ideas sobre a
vida. Realmente son reflexións metafísicas mesturadas con datos
autobiográficos, pero todo iso presentado dun xeito moi coloquial,
moi sinxelo e asequible.
-
Xa dende pequena sabías a que te querías dedicar cando foras maior?
Non,
en absoluto. Primeiro quería ser avogada (porque sempre fun bastante
defensora de causas perdidas), despois mestra, iso aínda me dura,
porque son unha docente vocacional. O tema da música encántame,
pero nunca esperaría adicarme a ela, de feito aínda me sorprende
hoxe.
-
Ademais de compoñer e cantar as túas cancións , estudaches varias
carreiras. Cales e por que as estudaches?
Estudei
dúas: Filoloxía Galega e Antropoloxía Social; tamén estudei un
par de cursos de Filosofía, pero tiven que aparcala por un tempo,
recuperareina en breve. Fixen o meu programa de doutoramento en
Lingüística e actualmente ando a facer a tese doutoral en
Literatura Comparada.
Para
min estudar sempre foi un xeito de aprender a vivir, para nada unha
imposición, todo o contrario. Escoitando á xente cos ollos aprendín
moitas cousas do mundo que me rodea e ensinoume a ser máis libre.
Creo que toda persoa que queira ser libre ten que comezar por
escoitar moito cos ollos, por ler moito e observar. Sobre todo as
mozas da vosa idade.
-
De todas as túas cancións, cales son aquelas coas que máis
conectas co teu público?
Creo
que a “Milonga
de aquí”, “Non son fada” e “Tempestades de sal”,
que
falan de humildade, igualdade e orgullo identitario. Esas son as que
máis me gusta sentir na boca da xente.
-
Na canción “A Paz Esquiva” falas dunha paz que se che resiste,
da paz que non se mantén. Que queres dicir?
Pois
sempre sentín unha tendencia á inquedanza interior, e diso falo.
Falo de atopar a paz dentro de min e de atopar unha reconciliación
cun contexto social e político que me desgusta e me fai sufrir,
moitas veces me provoca rabia, ira. Pero sempre falo diso desde a
vontade de reconciliarme con el e atopar esa paz. A miña e a nosa
paz.
-
O teu novo álbum denomínase Opoñerse
á extinción,
cal é o seu significado?
Pois
ese exactamente: opoñernos á nosa extinción como raza e como pobo.
Como raza porque se están perdendo os valores de empatía e
solidariedade que deberían ser inherentes e omnipresentes en todo
humano. Ademais falo tamén de opoñernos á extinción da identidade
galega. Pensade que as nenas e nenos xa non falan galego hoxe, moi
poucos, polo que nos queda pouco tempo de lingua e, en consecuencia,
de identidade galega. E a min iso faime chorar.
- Cal é o teu punto de vista sobre a situación da lingua galega na actualidade?
- Está en vías de extinción, como non tomemos a decisión individual de falala todas e todos, quedamos sen ela.
-
O 2016 rematou con 44 mortes por violencia de xénero e os casos de
maltrato seguen existindo en pleno século XXI. Cal cres que é a
causa principal?
A
educación. O sistema é hipócrita, celebra o 8 de marzo e o 25 de
novembro pero segue educando ás nenas para seren submisas e
secundarias e aos nenos para ser líderes. Poño un exemplo sinxelo:
cantos nenos vedes na rúa paseando bonecas nun carricoche? Hai unha
educación das nenas para a vida doméstica e dos nenos para o
liderado e iso crea mulleres resignadas, abnegadas e homes
sobre-empoderados, pero tamén perdidos. Iso sumado a un consumo de
violencia excesivo non pode ter outra consecuencia que o terrorismo
que estamos a sufrir.
-
Como cres que se podería conseguir saír dunha sociedade machista?
Con
cultura, con estudo e cun cambio no sistema educativo xa. Un cambio
drástico e axiña. Os contidos do sistema educativo, por exemplo,
son contidos hipermachistas. Cantas pensadoras estudades? Cantas
escritoras? Cantas científicas? Credes que non as houbo? Realmente
credes iso?
A
historia non é obxectiva, escríbea alguén obedecendo a uns
intereses determinados. Neste caso a historia escríbese para
perpetuar este sistema, porque son os donos do sistema os que a
escriben. Pero un cambio no sistema educativo non é suficiente sen
un cambio máis profundo do paradigma político-económico. O sistema
é piramidal para todo, críasenos na competitividade, crían lobos e
obteñen lobos. Non sei se o mundo asistirá antes da súa fin a un
cambio de pensamento, pero sen ese cambio, sen unha visión centrada
máis no horizontal que no vertical, estamos vendidos.
-
Moitas das túas cancións son de denuncia, reivindicativas e
liberais. Tiveches algunha vez problemas de liberdade de expresión
coas autoridades?
Si,
varias veces, incluso estiven imputada por asistir a unha
manifestación, simplemente por estar reclamando o dereito a
expresarme no meu idioma, xa ves. Pero non me preocupa: eu, como
Guevara, prefiro morrer de pé que vivir sempre axeonllada. Non me
gusta verme amedrentada, creo que se conseguen meternos o medo dentro
xa nos matan en vida. Eu quero vivir ben e feliz, e quero o mesmo
para todo o mundo, pero para iso hai que traballar sen medo; con
lucidez e precaución, pero sen medo.
-
A túa guitarra rosa non é unha calquera, é moi especial.
Poderíasme contar algo sobre ela? E dar os nomes das mulleres que “a
habitan”?
É
unha guitarra que eu fixen con fotos de mulleres que me marcaron, que
escoitei sempre cantar ou que me invitaron a pensar e me ensinaron a
vivir. Hai moitas: Simone de Beauvoir, Janis Joplin, Odetta; Joan
Baez, A Pasionaria, Big Mama Thornthon, Violeta Parra, Mercedes Sosa,
Nana Mouskuri, Etta James, Rosa Parks... moitas.
-
E xa para rematar, din que a túa orixe paterna está relacionada con
Mugardos, é iso certo?
Si,
meu avó paterno, o que me criou, era de Mugardos; e miña madriña
tamén o é. Eles sempre falaban moito de Mugardos e foron persoas
cruciais na miña vida, por iso me sinto moi perto da bisbarra de
Trasancos.
-
Poderiamos contar contigo durante este curso para actuar e falar un chisco con nós (ou
o que surxa) no IES de Mugardos ? Mira que estamos
traballando arreo sobre as mulleres!
Claro!!
E ese día lévovos a guitarra e así falamos delas. Mil bicos!!
Conclúe
así a entrevista con esta cantareira. Deica logo, Sés, e moitas
grazas!!